ایران کے وزیر خارجہ عباس عراقچی نے پاکستان کے دورے کے دوران فیلڈ مارشل عاصم منیر سے اہم ملاقات کی ہے۔
ایرانی سفارتخانے کی جانب سے جاری بیان کے مطابق عباس عراقچی نے پاکستان میں اپنی پہلی باضابطہ ملاقات فیلڈ مارشل عاصم منیر کے ساتھ کی، جسے دونوں ممالک کے درمیان سفارتی روابط کے حوالے سے اہم پیش رفت قرار دیا جا رہا ہے۔
سفارتی ذرائع کے مطابق اس ملاقات میں وفاقی وزیر داخلہ محسن نقوی کے علاوہ مشیر برائے قومی سلامتی جنرل عاصم ملک اور ڈی جی ملٹری انٹیلی جنس بھی شریک تھے۔
ذرائع کے مطابق ایرانی وفد میں نائب وزیر خارجہ غریب آبادی، اسلام آباد میں ایران کے سفیر امیری مقدم اور وزارت خارجہ کے ترجمان اسماعیل بقائی بھی شامل تھے۔
یاد رہے کہ ایرانی وزیر خارجہ عباس عراقچی گزشتہ روز ایک مختصر وفد کے ہمراہ پاکستان پہنچے تھے۔ اپنے دورے کے دوران وہ آج وزیراعظم شہباز شریف سے بھی ملاقات کریں گے۔
