لاہور ہائیکورٹ نے وزیراعلیٰ پنجاب مریم نواز کی جانب سے دائر درخواست منظور کرتے ہوئے 7 کروڑ روپے کی واپسی سے متعلق ہدایت جاری کر دی ہے۔
چیف جسٹس مس عالیہ نیلم کی سربراہی میں تین رکنی بینچ نے کیس کی سماعت کی، جس میں وزیراعلیٰ پنجاب کی جانب سے 7 کروڑ روپے کی واپسی کے لیے درخواست پر دلائل سنے گئے۔
عدالتی کارروائی کے دوران نیب کے وکیل نے بیانِ حلفی جمع کراتے ہوئے مؤقف اختیار کیا کہ وہ آئینی عدالت میں دائر درخواست واپس لینے کے مؤقف کی تصدیق کرتے ہیں۔ اس موقع پر مریم نواز کی نمائندگی وکیل جاوید ارشد بھٹی نے کی جبکہ اسسٹنٹ ڈپٹی اٹارنی جنرل رفاقت ڈوگر اور پراسیکیوٹر فاطمہ شاہد بھی عدالت میں موجود تھے۔
عدالت کو بتایا گیا کہ چوہدری شوگر مل کیس میں 7 کروڑ روپے بطور ضمانت جمع کروائے گئے تھے، اور چونکہ نیب نے اس کیس کو ختم کر دیا ہے، اس لیے جمع شدہ رقم کی واپسی کے احکامات جاری کیے جائیں۔
