کرپٹو کرنسی اور ڈیجیٹل سرمایہ کاری کے نام پر فراڈ اور اسکیمز میں خطرناک حد تک اضافہ سامنے آیا ہے، جس نے ماہرین اور مالیاتی اداروں کو شدید تشویش میں مبتلا کر دیا ہے۔
ماہرین کے مطابق جدید ٹیکنالوجی، بلاک چین اور ڈیجیٹل کرنسی کے نام پر عام شہریوں کو منظم طریقے سے لوٹا جا رہا ہے۔ فراڈیے پہلے سوشل میڈیا پلیٹ فارمز، میسجنگ ایپس اور آن لائن گروپس کے ذریعے صارفین کا اعتماد حاصل کرتے ہیں، پھر انہیں زیادہ منافع اور تیز آمدنی کے جھانسے میں سرمایہ کاری پر آمادہ کیا جاتا ہے۔
بعد ازاں جعلی موبائل ایپلیکیشنز، فرضی ویب سائٹس اور غیر رجسٹرڈ پلیٹ فارمز کے ذریعے سرمایہ کاروں کی رقوم اچانک غائب کر دی جاتی ہیں، جس کے بعد متاثرہ افراد کے پاس کوئی قانونی یا تکنیکی چارہ نہیں رہتا۔
رپورٹس کے مطابق کرپٹو مارکیٹ میں سب سے زیادہ فراڈ “میم کوائنز” اور جعلی لانچ کیے گئے ٹوکنز کے ذریعے کیا جا رہا ہے۔ یہ منصوبے ابتدا میں غیر معمولی منافع کے دعوے کرتے ہیں، سوشل میڈیا پر وائرل مارکیٹنگ کی جاتی ہے اور متاثرہ افراد کو جلد امیر بننے کے خواب دکھائے جاتے ہیں۔
ماہرین نے خبردار کیا ہے کہ جیسے ہی بڑی تعداد میں لوگ سرمایہ لگا دیتے ہیں، منصوبہ ساز اچانک غائب ہو جاتے ہیں اور سرمایہ کاروں کی رقم ڈوب جاتی ہے۔
مزید بتایا گیا ہے کہ کرپٹو کرنسی ایک غیر مرکزی اور غیر ریگولیٹڈ ڈیجیٹل نظام ہے، جس کی وجہ سے اس میں خطرات زیادہ ہوتے ہیں۔ اگر سرمایہ کاری سے پہلے مکمل تحقیق نہ کی جائے تو نقصان کا امکان کئی گنا بڑھ جاتا ہے۔
ماہرین نے عوام کو مشورہ دیا ہے کہ کسی بھی آن لائن سرمایہ کاری سے پہلے مکمل تصدیق کریں، غیر معروف پلیٹ فارمز سے دور رہیں، اور غیر حقیقی منافع کے دعووں پر ہرگز یقین نہ کریں۔