پاکستانی اداکارہ صبا قمر ایک بار پھر اپنے منفرد اور فلسفیانہ خیالات کے باعث سوشل میڈیا پر توجہ کا مرکز بن گئی ہیں۔ ایک وائرل ویڈیو میں انہوں نے اپنی زندگی، خواہشات اور اندرونی ادھورے پن کے احساس پر نہایت گہرے انداز میں گفتگو کی۔
صبا قمر نے کہا کہ ان کی زندگی انہیں بھارتی ہدایتکار امتیاز علی کی فلموں جیسی محسوس ہوتی ہے، جہاں ادھورے پن کے باوجود ایک خاص خوبصورتی اور کشش موجود ہوتی ہے۔
ان کے مطابق وہ خود کو ایک نامکمل روح سمجھتی ہیں اور ان کا ماننا ہے کہ زندگی میں کچھ خواہشات اور چیزوں کا ادھورا رہ جانا بھی اپنی الگ معنویت رکھتا ہے۔
اداکارہ نے مزید کہا کہ جب انسان کی تمام خواہشات پوری ہو جائیں تو پھر خواہش کرنے کا جذبہ بھی کم ہو جاتا ہے، اسی لیے درد، کمی اور ادھورے پن میں بھی ایک خاص لطف اور گہرائی چھپی ہوتی ہے۔
صبا قمر کے اس اندازِ فکر نے مداحوں کو نہ صرف متاثر کیا ہے بلکہ انہیں زندگی کے مختلف پہلوؤں پر سوچنے پر بھی مجبور کر دیا ہے۔
