سیکیورٹی فورسز نے پاک-افغان سرحد پر دراندازی کی کوشش ناکام بناتے ہوئے 16 دہشت گردوں کو ہلاک کر دیا۔ آئی ایس پی آر کے مطابق، 22 اور 23 مارچ کی درمیانی شب شمالی وزیرستان کے علاقے غلام خان کلی میں دہشت گردوں کی نقل و حرکت کو بروقت مانیٹر کیا گیا اور فوری کارروائی کرتے ہوئے ان کی دراندازی کی کوشش ناکام بنائی گئی۔ شدید فائرنگ کے تبادلے میں تمام 16 دہشت گرد مارے گئے۔
پاکستان مسلسل عبوری افغان حکومت سے مطالبہ کر رہا ہے کہ وہ سرحدی نگرانی کے مؤثر انتظامات یقینی بنائے اور اپنی سرزمین کو پاکستان کے خلاف دہشت گردی کے لیے استعمال ہونے سے روکے۔ سیکیورٹی فورسز اپنی سرحدوں کے تحفظ اور ملک سے دہشت گردی کے خاتمے کے لیے پُرعزم ہیں اور ہر قیمت پر اس ناسور کو جڑ سے اکھاڑ پھینکنے کے لیے تیار ہیں۔
وزیرِ اعظم شہباز شریف نے کامیاب کارروائی پر سیکیورٹی فورسز کو خراج تحسین پیش کرتے ہوئے کہا کہ دہشت گردوں کے ناپاک عزائم کو کبھی کامیاب نہیں ہونے دیں گے۔ انہوں نے مزید کہا کہ پوری قوم دہشت گردی کے خلاف جنگ میں اپنی بہادر افواج کے شانہ بشانہ کھڑی ہے۔
