پاکستانی اور بھارتی شہریوں کی واپسی کی مہلت ختم، بھارت نے کسانوں کو کھیت خالی کرنے کا حکم دے دیا

پاکستان اور بھارت کے درمیان حالیہ کشیدگی کے دوران بھارت نے پاکستانی شہریوں کو واپس جانے کے لیے دی گئی مہلت کا وقت ختم کر دیا ہے۔ تاہم، اس دوران 536 پاکستانی بھارت سے واپس پاکستان پہنچے جبکہ 849 بھارتی شہری اپنے ملک واپس لوٹ گئے ہیں۔
میڈیا نیوز کے مطابق، لانگ ٹرم ویزا رکھنے والے پاکستانی اور بھارتی شہریوں کی واپسی کا مسئلہ حل نہیں ہو سکا۔ بارڈر کے دونوں طرف کئی خاندان اپنے گھروں میں واپس آنے کی امید لگائے بیٹھے ہیں۔ اسی دوران، بھارت نے جنگی جنون میں مبتلا ہو کر بھارتی پنجاب کے سرحدی علاقوں میں کسانوں کو دو دن کے اندر اپنی فصلیں کاٹنے اور کھیت خالی کرنے کا حکم دے دیا ہے۔
اتوار کو 236 پاکستانی بھارت سے واپس پہنچے جبکہ 115 بھارتی شہری واپس اپنے ملک چلے گئے۔ گزشتہ تین روز کے دوران مجموعی طور پر 536 پاکستانی بھارت سے واپس آئے ہیں اور 849 بھارتی اپنے ملک واپس چلے گئے ہیں۔
دونوں ممالک کے درمیان بڑھتی کشیدگی کے سبب، وہ پاکستانی شہری جن کی شادی بھارت میں ہوئی ہے یا وہ ماضی میں پاکستان چھوڑ کر بھارت منتقل ہوئے تھے، ان کی واپسی کا مسئلہ پیچیدہ ہو گیا ہے۔ اسی طرح، ایسے بھارتی شہری جن کی شادی پاکستان میں ہوئی ہے اور وہ اس وقت بھارت میں موجود ہیں، انہیں واپس پاکستان آنے کے لیے نئی دہلی میں پاکستانی ہائی کمیشن سے رابطہ کرنا چاہیے۔
مزید برآں، بھارت نے بھارتی پنجاب کے بارڈر ایریاز میں کسانوں کو 48 گھنٹوں میں اپنے کھیت خالی کرنے کا حکم دیا ہے، جس سے اس علاقے میں کشیدگی اور بڑھ گئی ہے۔ ادھر پاکستان کے بارڈر ایریاز میں زندگی معمول کے مطابق جاری ہے اور کسان اپنے روزمرہ کے کام کر رہے ہیں۔