اسلام آباد:وفاقی حکومت نے تمام وزارتوں اور ڈویژنز کو ہدایت جاری کی ہے کہ وہ مالی سال 2024-25 کے دوران بچ جانے والے فنڈز کو 30 اپریل 2025 تک قومی خزانے میں واپس جمع کروائیں۔
ذرائع کے مطابق یہ فیصلہ آئندہ مالی سال 2025-26 کے بجٹ کی تیاری کے عمل کے تحت کیا گیا ہے۔ اس حوالے سے وزارت خزانہ کی جانب سے جاری کردہ ہدایت نامے میں تمام وزارتوں اور ڈویژنز کے پرنسپل اکاؤنٹنگ افسران کو ہدایت کی گئی ہے کہ وہ مقررہ مدت کے اندر غیر استعمال شدہ بجٹ کی تفصیلات جمع کرائیں۔
وزارت خزانہ کے حکام کا کہنا ہے کہ یہ فیصلہ پبلک اکاؤنٹس کمیٹی کی سفارشات کی روشنی میں کیا گیا ہے، تاکہ موجودہ مالی سال کے نظرثانی شدہ تخمینوں کو حتمی شکل دی جا سکے اور آئندہ بجٹ کے تخمینوں کی تیاری میں مدد ملے۔
حکام کے مطابق بچ جانے والے فنڈز میں سول حکومت کے روزمرہ اخراجات، سبسڈیز اور ترقیاتی بجٹ شامل ہیں۔ رواں مالی سال کے لیے حکومت نے ترقیاتی کاموں کے لیے 1100 ارب روپے مختص کیے تھے، جن میں سے اب تک صرف 450 ارب روپے ہی خرچ ہو سکے ہیں۔
وزارت خزانہ کا کہنا ہے کہ باقی ماندہ فنڈز ان شعبوں کو منتقل کیے جائیں گے جہاں ان کی فوری ضرورت ہے، تاکہ وسائل کا مؤثر استعمال ممکن بنایا جا سکے۔
