ملک بھر کے بجلی صارفین کے لیے ریلیف کی خبر سامنے آ گئی ہے، کیونکہ بجلی کی قیمت میں فی یونٹ کمی کا امکان ظاہر کیا جا رہا ہے۔ سینٹرل پاور پرچیزنگ ایجنسی کی جانب سے دائر کی گئی درخواست کی منظوری کی صورت میں نومبر کی ماہانہ فیول ایڈجسٹمنٹ کے تحت بجلی 72 پیسے فی یونٹ سستی ہو سکتی ہے۔
ذرائع کے مطابق سی پی پی اے نے ماہانہ فیول ایڈجسٹمنٹ سے متعلق درخواست نیشنل الیکٹرک ریگولیٹری اتھارٹی میں جمع کرا دی ہے، جس پر نیپرا 31 دسمبر کو سماعت کرے گی۔ درخواست منظور ہونے کی صورت میں صارفین کو بجلی کے بلوں میں نمایاں ریلیف ملنے کا امکان ہے۔
درخواست میں بتایا گیا ہے کہ نومبر کے دوران ڈسکوز کو مجموعی طور پر 7 ارب 81 کروڑ 30 لاکھ یونٹس بجلی فراہم کی گئی، جبکہ اسی ماہ بجلی کی اوسط فی یونٹ لاگت 6 روپے 16 پیسے ریکارڈ کی گئی۔
نیپرا میں جمع کرائی گئی دستاویزات کے مطابق نومبر کے مہینے میں بجلی کی پیداوار کے لیے مختلف ذرائع استعمال کیے گئے۔ اعداد و شمار کے مطابق 39.16 فیصد بجلی پانی سے پیدا کی گئی، 9.34 فیصد مقامی کوئلے، 5.06 فیصد درآمدی کوئلے، 8.44 فیصد گیس، 8.64 فیصد درآمدی ایل این جی جبکہ 25.23 فیصد بجلی جوہری ایندھن سے حاصل کی گئی۔
نیپرا کی جانب سے درخواست کی منظوری کی صورت میں بجلی صارفین کو نومبر کی فیول ایڈجسٹمنٹ کے تحت 72 پیسے فی یونٹ سستی بجلی ملنے کا امکان ہے، جس سے مہنگائی کے دباؤ میں کسی حد تک کمی آ سکتی ہے۔
