سونے اور چاندی کی قیمتوں میں ریکارڈ اضافہ، مقامی مارکیٹ میں نئی بلند ترین سطح

کراچی: عالمی اور مقامی مارکیٹوں میں سونے کی قیمتوں میں ایک بار پھر اضافہ ریکارڈ کیا گیا ہے، جبکہ چاندی کے ریٹس ملکی تاریخ کی نئی بلند ترین سطح پر پہنچ گئے ہیں۔
بین الاقوامی بلین مارکیٹ میں فی اونس سونے کی قیمت میں 5 ڈالر کا اضافہ ہوا، جس کے بعد نرخ بڑھ کر 4212 ڈالر ہوگئے۔ عالمی قیمت میں اضافے کے اثرات مقامی صرافہ مارکیٹوں پر بھی نمایاں دکھائی دیے، جہاں جمعرات کے روز 24 قیراط سونے کا فی تولہ ریٹ مزید 500 روپے بڑھ کر 4 لاکھ 43 ہزار 562 روپے پر پہنچ گیا۔
فی 10 گرام سونا بھی 428 روپے مہنگا ہوگیا، جس کے بعد اس کی قیمت 3 لاکھ 80 ہزار 282 روپے مقرر کی گئی۔
ادھر چاندی کی قیمتوں میں بھی نمایاں اضافہ دیکھنے میں آیا۔ فی تولہ چاندی 85 روپے بڑھ کر 6 ہزار 452 روپے پر جا پہنچی، جو ملکی تاریخ کی نئی بلند ترین سطح ہے۔ اسی طرح فی 10 گرام چاندی کے نرخ 73 روپے اضافے کے بعد 5 ہزار 531 روپے کی ریکارڈ سطح پر پہنچ گئے۔