لاہور، فیصل آباد اور بہاولپور میں بڑے حادثات سے بچاؤ ممکن ہو گیا جب کہ پنجاب کی سی ٹی ڈی نے بھارتی خفیہ ایجنسی را کے 12 دہشت گردوں کو گرفتار کر لیا۔ گرفتار دہشت گردوں کے قبضے سے بھاری مقدار میں اسلحہ، بارودی مواد، ڈیٹونیٹر، آئی ای ڈی بم اور نقدی بھی برآمد ہوئی۔
سی ٹی ڈی پنجاب کے ترجمان کے مطابق گرفتار دہشت گرد حساس مقامات اور اداروں کی تصویریں، ویڈیوز اور لوکیشنز بھی اپنے پاس رکھتے تھے۔ ان دہشت گردوں نے مدرسے اور میلے کی تصاویر اور لوکیشنز بھی جمع کی ہوئی تھیں۔
فیصل آباد سے گرفتار دہشت گرد پنجاب میں خوف و ہراس پھیلانے کے ساتھ مذہبی منافرت کا بھی منصوبہ رکھتے تھے۔
لاہور سے گرفتار دہشت گردوں میں سکھ دیپ سنگھ، عظمت، فیضان، نبیل، ابرار، عثمان، اور سرفراز شامل ہیں جبکہ فیصل آباد سے دانش کو گرفتار کیا گیا۔ بہاولپور سے گرفتار دہشت گردوں میں رجب، ہاشم، ثاقب اور عارف شامل ہیں۔
سی ٹی ڈی نے عادل نامی فیس بک آئی ڈی کی مدد سے دہشت گردوں کو گرفتار کیا، جو بھارت سے را کی ہدایات پر کام کر رہی تھی۔ فتنہ الہندوستان کے دہشت گرد سکھ دیپ سنگھ پیدائشی مسیحی تھے جنہوں نے کچھ عرصہ قبل مذہب تبدیل کیا تھا۔
ترجمان کے مطابق دہشت گردوں کو بھارتی ایجنسی را سے بھاری فنڈنگ بھی فراہم کی جاتی تھی۔ گرفتار دہشت گردوں کے خلاف مقدمات درج کر کے مزید تحقیقات جاری ہیں۔ قبضے سے برآمد اشیاء میں 7 آئی ای ڈی بم، 2 ڈیٹونیٹر، حفاظتی فیوز وائر 102 فٹ، موبائل فونز، نقدی اور اسلحہ شامل ہے۔
