پاکستان نے برطانیہ سے شہزاد اکبر اور عادل راجہ کی فوری حوالگی کا مطالبہ کر دیا

اسلام آباد: پاکستان نے برطانیہ سے شہزاد اکبر اور عادل راجہ کی فوری حوالگی کا مطالبہ کر دیا ہے اور کہا ہے کہ یہ دونوں افراد پاکستان میں انتہائی مطلوب ہیں۔
وزیر داخلہ محسن نقوی کی برطانوی ہائی کمشنر جین میریٹ سے اہم ملاقات ہوئی، جس میں پاک-برطانیہ تعلقات، سیکیورٹی تعاون اور باہمی دلچسپی کے امور پر تفصیلی تبادلۂ خیال کیا گیا۔ ملاقات میں وفاقی سیکریٹری داخلہ محمد خرم آغا اور دیگر متعلقہ افسران بھی شریک تھے۔
محسن نقوی نے برطانیہ میں غیر قانونی طور پر مقیم پاکستانیوں کی وطن واپسی کے معاملات پر بات کی اور شہزاد اکبر اور عادل راجہ کے حوالگی کے دستاویزات برطانوی ہائی کمشنر کو فراہم کیے۔
وزیر داخلہ نے زور دیا کہ یہ دونوں افراد پاکستان میں مطلوب ہیں، اس لیے انہیں فوری طور پر وطن واپس بھیجا جائے۔ انہوں نے فیک نیوز اور پروپیگنڈا پھیلانے والے پاکستانی شہریوں کے خلاف بھی ٹھوس شواہد پیش کیے اور کہا کہ آزادی اظہار کا احترام کیا جاتا ہے، لیکن ریاست اور اداروں کے خلاف بیرون ملک پروپیگنڈا ہرگز قابل قبول نہیں۔ پاکستان مخالف پروپیگنڈا کرنے والوں کی واپسی کے لیے برطانیہ کے تعاون کا خیرمقدم کیا جائے گا۔
محسن نقوی نے مزید بتایا کہ وزارت داخلہ نے وزارت خارجہ کے ذریعے بھی حوالگی کے عمل (extradition process) کا آغاز کر دیا ہے۔