اسلام آباد: کرغزستان کے صدر صادر ژاپاروف پاکستان کے سرکاری دورے پر پہنچے اور وزیراعظم ہاؤس آمد پر ان کا پرتپاک استقبال کیا گیا۔ اس موقع پر پاک فوج کے دستے نے شاندار گارڈ آف آنر پیش کیا۔
وزیرِ اعظم شہباز شریف نے صدر ژاپاروف سے گرمجوشی کے ساتھ ملاقات کی اور دونوں رہنماؤں نے مصافحہ کیا۔ اس دوران دونوں ممالک کے قومی ترانے بھی بجائے گئے۔
وزیرِ اعظم نے معزز مہمان کو اپنی کابینہ کے ارکان سے متعارف کرایا جبکہ صدر ژاپاروف نے اپنے وفد کا تعارف کروایا۔ وزیراعظم ہاؤس کے احاطے میں صدر ژاپاروف نے یادگار پودا بھی لگایا۔
واضح رہے کہ یہ دورہ صدر ژاپاروف کا پاکستان کا پہلا سرکاری دورہ ہے، اور دو دہائیوں بعد کسی کرغیز صدر کا پہلا دورہ ہے۔
نائب وزیرِ اعظم سے ملاقات:
ڈپٹی وزیرِ اعظم و وزیرِ خارجہ اسحاق ڈار نے صدر ژاپاروف سے ملاقات کی، جس میں پاکستان نے دوطرفہ تعلقات کو مضبوط بنانے کا عزم دہرایا۔
دفترِ خارجہ کے مطابق صدر ژاپاروف دو روزہ سرکاری دورے پر ہیں۔ ملاقات کے دوران اسحاق ڈار نے صدر ژاپاروف اور ان کے وفد کو پاکستان آمد پر خوش آمدید کہا اور صدر آصف علی زرداری اور وزیرِ اعظم شہباز شریف کی نیک تمنائیں پہنچائیں۔
اسحاق ڈار نے کہا کہ پاکستان اعلیٰ سطح پر کرغزستان کے ساتھ مختلف شعبوں میں تعاون بڑھانے کا خواہاں ہے اور صدر ژاپاروف کو قیادت سے ملاقات، کاروباری روابط، اور دوطرفہ تعاون کے فروغ کے مواقع سے آگاہ کیا۔
