دوحہ: صدرِ مملکت آصف علی زرداری تین روزہ سرکاری دورے پر قطر پہنچ گئے جہاں حماد انٹرنیشنل ایئرپورٹ پر قطری حکام اور پاکستان کے سفیر نے ان کا پُرتپاک استقبال کیا اور انہیں گلدستہ پیش کیا۔
صدر آصف علی زرداری اپنے دورۂ قطر کے دوران عالمی سماجی ترقیاتی کانفرنس میں شرکت کریں گے، جہاں وہ پاکستان کی سماجی ترقی، معاشی شمولیت اور غربت میں کمی کے لیے کیے گئے اقدامات پر تفصیل سے روشنی ڈالیں گے۔
صدرِ مملکت اس موقع پر بینظیر انکم سپورٹ پروگرام (بی آئی ایس پی) کے ذریعے سماجی تحفظ کے نظام کو مضبوط بنانے کے لیے حکومتی اقدامات سے بھی شرکاء کو آگاہ کریں گے۔
علاوہ ازیں، وہ دوحہ الائنس برائے سوشل پروٹیکشن اینڈ جابز کمپیکٹ کے آغاز سے متعلق منصوبوں پر بھی گفتگو کریں گے اور پائیدار ترقی کے عالمی اہداف (SDGs) کی تکمیل کے لیے مالی وسائل اور عالمی تعاون کی اہمیت پر زور دیں گے۔
صدر آصف علی زرداری اپنے قیام کے دوران مختلف عالمی، علاقائی رہنماؤں اور بین الاقوامی تنظیموں کے نمائندوں سے ملاقاتیں بھی کریں گے تاکہ سماجی و اقتصادی ترقی کے میدان میں باہمی اشتراک کو مزید فروغ دیا جا سکے۔
