اسلام آباد (نیوز ڈیسک) وزیر اعظم شہباز شریف آج دوحا روانہ ہوں گے جہاں وہ عرب اسلامی سربراہی کانفرنس کے ہنگامی اجلاس میں پاکستان کی نمائندگی کریں گے۔یہ اجلاس قطر میں اسرائیلی فضائی حملوں، فلسطین میں بڑھتی کشیدگی اور فلسطینیوں کی جبری بے دخلی کے پس منظر میں طلب کیا گیا ہے۔او آئی سی کے رکن ممالک کے سربراہان، وزرائے اعظم اور اعلیٰ حکام اس اجلاس میں شریک ہوں گے۔ ذرائع کے مطابق پاکستان نے قطر کے ساتھ اپنے قریبی تعلقات کو ہمیشہ اہمیت دی ہے اور اسرائیلی جارحیت کی سخت مذمت کی ہے۔یاد رہے کہ وزیر اعظم شہباز شریف نے 11 ستمبر 2025 کو بھی دوحا کا دورہ کیا تھا، جہاں انہوں نے قطری قیادت کو پاکستان کی یکجہتی، قطر کی سلامتی و خودمختاری کے لیے غیر متزلزل حمایت اور مشرق وسطیٰ میں امن و استحکام کے عزم کا یقین دلایا تھا۔
