ملک بھر میں انسداد اسمگلنگ کے دوران 4 کروڑ 22 لاکھ روپے سے زائد مالیت کی منشیات برآمد کرلی گئی۔
اینٹی نارکوٹکس فورس (اے این ایف) کے ترجمان کے مطابق ملک کے مختلف شہروں اور تعلیمی اداروں کے اطراف میں منشیات کی اسمگلنگ اور فروخت کے خلاف کارروائیاں جاری ہیں۔ سات مختلف کارروائیوں کے دوران 8 ملزمان کو گرفتار کیا گیا اور مجموعی طور پر 239 کلوگرام منشیات ضبط کی گئیں۔
ہتار روڈ ہری پور میں یونیورسٹی کے قریب ایک ملزم سے 400 گرام چرس برآمد کی گئی، جس نے طلبہ کو منشیات فروخت کرنے کا اعتراف کیا۔
دیگر کارروائیوں میں
جی ٹی روڈ پشاور کے قریب گاڑی سے 46.8 کلو گرام افیون، 26.4 کلو گرام چرس، 2 کلوگرام آئس اور 1 کلو ہیروئن برآمد کی گئی اور ملزم گرفتار ہوا۔
گولڑہ موڑ اسلام آباد کے قریب گاڑی سے 7.2 کلو چرس برآمد کرکے 3 ملزمان کو گرفتار کیا گیا۔
فیض آباد اسلام آباد میں 2.4 کلو چرس برآمد کی گئی۔
نیازی اڈہ لاہور کے قریب موٹر سائیکل سوار ملزم سے 13.2 کلو چرس اور 2.4 کلو آئس ضبط کی گئی۔
گرین ویلی شیخوپورہ کے قریب ملزم کے قبضے سے 13.2 کلو افیون، 3.6 کلو چرس، 280 گرام آئس اور 1 کلو ہیروئن برآمد ہوئی۔
نوکنڈی چاغی کے قریب زمین میں چھپائی گئی 120 کلو افیون بھی ضبط کی گئی۔
تمام کارروائیوں کے بعد انسداد منشیات ایکٹ کے تحت مقدمات درج کر کے تحقیقات کا آغاز کیا گیا ہے۔
