علیمہ خان کی ججز سے انصاف کی اپیل، سزاؤں کو غیر قانونی قرار دینے کا مطالبہ

اسلام آباد: پاکستان تحریک انصاف کے بانی عمران خان کی بہن، علیمہ خان، نے کہا ہے کہ دعا ہے ججز ہمت دکھا کر انصاف فراہم کریں اور دی گئی سزاؤں کو غیر قانونی قرار دیں۔
سپریم کورٹ کے باہر میڈیا سے گفتگو کرتے ہوئے انہوں نے بتایا کہ وہ 9 مئی کے کیس میں سپریم کورٹ آئی ہیں، جہاں اگلے ہفتے تک اپیلیں سماعت کے لیے مقرر ہو گئی ہیں، تاہم اسلام آباد ہائی کورٹ میں القادر ٹرسٹ کیس کی اپیل تاحال سماعت کے لیے نہیں لگی۔
علیمہ خان کا کہنا تھا کہ چیف جسٹس اسلام آباد ہائی کورٹ سرفراز ڈوگر ہماری اپیل نہیں سنتے، خوشی ہے کہ سپریم کورٹ نے 19 اگست کی تاریخ دے دی۔ انہوں نے مزید کہا کہ جھوٹی گواہیوں پر درج ایف آئی آرز بنانے والوں کو جیل میں ہونا چاہیے۔
ان کا مؤقف تھا کہ ججز کو چاہیے کہ وہ انصاف فراہم کرتے ہوئے ان سزاؤں کو کالعدم قرار دیں جو سیاسی بنیادوں پر دی گئی ہیں۔