ڈھاکا: سری لنکا کے خلاف ٹیسٹ سیریز میں بدترین شکست کے بعد بنگلہ دیش کے ٹیسٹ کپتان نجم الحسن شانتو نے قیادت سے دستبردار ہونے کا اعلان کر دیا۔ بنگلہ دیش کو اس میچ میں اننگز اور 78 رنز سے شکست کا سامنا کرنا پڑا، جس کے بعد شانتو نے پریس کانفرنس میں اپنی ٹیسٹ کپتانی چھوڑنے کا فیصلہ عوام کے سامنے رکھا۔
نجم الحسن شانتو کا کہنا تھا کہ وہ اب ٹیسٹ فارمیٹ میں قیادت جاری نہیں رکھنا چاہتے کیونکہ ٹیم کے مفاد میں یہی بہتر ہے۔ ان کے مطابق تین فارمیٹس کے لیے تین مختلف کپتان رکھنا ٹیم کے لیے موزوں نہیں، اور وہ اس فیصلے سے پہلے ہی بورڈ کو آگاہ کر چکے تھے۔
انہوں نے زور دیا کہ یہ فیصلہ کسی جذباتی ردعمل یا مایوسی کا نتیجہ نہیں بلکہ ٹیم کی بہتری کے پیشِ نظر کیا گیا ہے۔
شانتو نے نومبر 2023 میں نیوزی لینڈ کے خلاف ہوم سیریز سے بنگلہ دیش کی ٹیسٹ ٹیم کی قیادت سنبھالی تھی۔ ان کی کپتانی میں ٹیم نے 14 ٹیسٹ میچز کھیلے، جن میں 4 جیتے، 9 ہارے اور ایک میچ برابر رہا۔
بطور کپتان ان کی سب سے نمایاں کارکردگی اگست 2024 میں پاکستان کے خلاف دو ٹیسٹ میچز میں فتح رہی۔ بیٹنگ کے شعبے میں بھی ان کا اوسط بحیثیت کپتان 36.24 رہا، جو بغیر کپتانی کے ان کے اوسط 29.83 سے بہتر ہے۔
واضح رہے کہ رواں ماہ کے آغاز میں انہیں ون ڈے ٹیم کی قیادت سے بھی ہٹا دیا گیا تھا، اور ان کی جگہ مہدی حسن کو کپتان مقرر کیا گیا تھا۔
