ملتان(عوامی رپورٹر) شہریوں کو مالی دھوکہ دہی سے بچانے اور ہاؤسنگ سیکٹر میں شفافیت کو یقینی بنانے کے لیے قومی احتساب بیورو ملتان اور ملتان ڈویلپمنٹ اتھارٹی نے مشترکہ کارروائی کا عزم ظاہر کیا ہے۔یہ فیصلہ نیب ملتان میں منعقدہ “تدارک بدعنوانی کانفرنس” کے دوران کیا گیا، جس کی صدارت ڈائریکٹر جنرل نیب ملتان نے کی۔اجلاس میں ڈائریکٹر جنرل ایم ڈی اے اور دیگر افسران بھی شریک ہوئے۔اجلاس کا موضوع “ہاؤسنگ سیکٹر میں ایم ڈی اے کی کارکردگی میں انتظامی بہتری اور عوام کو مالی دھوکہ دہی سے بچاؤ” تھا، جس میں ہاؤسنگ قوانین کے مؤثر نفاذ اور انتظامی چیلنجز پر تفصیلی گفتگو ہوئی۔دونوں اداروں نے اس بات پر اتفاق کیا کہ ہاؤسنگ اسکیم کی حتمی منظوری سے قبل پلاٹوں کی فروخت، منتقلی یا تشہیر پر سختی سے پابندی عائد کی جائے گی۔ بغیر منظوری سکیموں کی فیسوں کی وصولی، رہن معاہدے یا ریونیو ریکارڈ میں اندراج کی بھی اجازت نہیں ہوگی۔نیب اور ایم ڈی اے نے مؤثر تعاون کے ذریعے قواعد و ضوابط کے نفاذ کو مزید بہتر بنانے اور عوامی مفاد کو یقینی بنانے کے عزم کا اعادہ کیا۔ ڈائریکٹر جنرل نیب ملتان نے کہا کہ فراڈ پر مبنی ہاؤسنگ اسکیموں کے خلاف بلا امتیاز کارروائی کی جائے گی اور شہریوں کے مفادات کا ہر قیمت پر تحفظ کیا جائے گا۔
