اسلام آباد: امریکی جیل میں قید ڈاکٹر عافیہ صدیقی کی صحت اور وطن واپسی کے لیے سماعت کا نیا بینچ بھی ٹوٹ گیا۔ اسلام آباد ہائی کورٹ کے جسٹس انعام امین منہاس نے لارجر بینچ کی تشکیل کے لیے فائل چیف جسٹس کو ارسال کر دی۔
یہ کیس پہلے جسٹس سردار اعجاز اسحاق خان کی عدالت میں زیر سماعت تھا، جنہوں نے عدالتی حکم عدولی پر وزیراعظم اور کابینہ ارکان کو توہین عدالت کے نوٹس جاری کیے تھے۔ بعد ازاں یہ کیس جسٹس انعام امین منہاس کی عدالت منتقل کر دیا گیا۔
درخواست ڈاکٹر عافیہ کی بہن ڈاکٹر فوزیہ صدیقی کی جانب سے دائر کی گئی تھی۔ عدالت نے کہا کہ ماسٹر آف روسٹر کون ہے، اس کا فیصلہ لارجر بینچ کرے گا۔ جسٹس انعام امین منہاس نے کہا کہ دو آرا آنے کی وجہ سے یہ معاملہ لارجر بینچ کو بھیجا جا رہا ہے تاکہ حتمی فیصلہ ہو سکے۔
اس سے قبل جسٹس سردار اعجاز اسحاق کے تمام کیسز واپس لے کر انہیں جسٹس بابر ستار کی سربراہی میں ٹیکس کیسز والے اسپیشل ڈویژن بینچ میں منتقل کیا گیا تھا۔
