پاکستان کے جارح مزاج نوجوان بیٹر صائم ایوب جنوبی افریقا کے خلاف ٹیسٹ سیریز کے دوران ٹخنے کی انجری کا شکار ہونے کے بعد 10 ہفتوں کے لیے کرکٹ سے باہر ہو گئے۔
پاکستان کرکٹ بورڈ (پی سی بی) نے صائم ایوب کی انجری کے حوالے سے اپ ڈیٹ جاری کرتے ہوئے بتایا کہ انہیں مکمل صحتیابی کے لیے 10 ہفتوں تک کرکٹ سے دور رہنے کا مشورہ دیا گیا ہے۔
صائم ایوب 3 جنوری کو جنوبی افریقا کے خلاف ٹیسٹ میچ کے دوران فیلڈنگ کرتے ہوئے ٹخنے کی چوٹ کا شکار ہوئے تھے۔ پی سی بی کے اعلامیے کے مطابق، ڈاکٹرز نے ایم آر آئی اسکین، ایکسریز اور دیگر میڈیکل رپورٹس کے بعد انہیں آرام کا مشورہ دیا ہے۔
پی سی بی کے مطابق، صائم ایوب کی صحت میں بہتری آ رہی ہے، تاہم ان کی نیوزی لینڈ کے خلاف سیریز میں شرکت ان کی فٹنس سے مشروط ہوگی۔ اس دوران وہ انگلینڈ میں اپنا ری ہیب جاری رکھیں گے۔