اسلام آباد/واشنگٹن: وزیراعظم شہباز شریف نے امریکی صدر ڈونلڈ ٹرمپ کو امن کا علمبردار قرار دیتے ہوئے کہا ہے کہ ان کی قیادت میں پاکستان اور امریکا کے تعلقات مزید مضبوط ہوں گے۔
وزیراعظم آفس کے جاری اعلامیے کے مطابق وزیراعظم شہباز شریف اور آرمی چیف جنرل سید عاصم منیر نے وائٹ ہاؤس میں صدر ٹرمپ سے خوشگوار اور دوستانہ ملاقات کی۔
ملاقات کے دوران وزیراعظم نے صدر ٹرمپ کی عالمی تنازعات کے خاتمے کے لیے مخلصانہ کوششوں کو سراہا اور پاک بھارت سیزفائر میں ان کے فیصلہ کن کردار کو اہم قرار دیتے ہوئے کہا کہ اس اقدام سے جنوبی ایشیا میں ایک بڑے بحران کو ٹالا جا سکا۔
مشرق وسطیٰ کی صورتحال پر گفتگو کرتے ہوئے وزیراعظم نے غزہ میں جنگ بندی کے لیے صدر ٹرمپ کی کوششوں کی تعریف کی، خاص طور پر نیویارک میں مسلم دنیا کے اہم رہنماؤں کے ساتھ مشاورت کو قابلِ تحسین قرار دیا۔
وزیراعظم نے اس موقع پر صدر ٹرمپ کا پاکستان اور امریکا کے درمیان رواں سال ہونے والے ٹیرف معاہدے پر شکریہ ادا کیا اور دیرینہ شراکت داری کو سراہتے ہوئے کہا کہ یہ تعلقات صدر ٹرمپ کی قیادت میں مزید مضبوط ہوں گے۔
اس موقع پر انہوں نے امریکی کمپنیوں کو پاکستان کے زراعت، آئی ٹی، معدنیات اور توانائی کے شعبوں میں سرمایہ کاری کی دعوت دی۔
دونوں رہنماؤں کے درمیان خطے کی سلامتی اور انسداد دہشتگردی پر بھی تبادلہ خیال ہوا۔ وزیراعظم نے انسداد دہشتگردی میں پاکستان کے کردار کی توثیق پر صدر ٹرمپ کا شکریہ ادا کیا اور سکیورٹی و انٹیلیجنس کے شعبوں میں تعاون کو مزید بڑھانے پر زور دیا۔
آخر میں وزیراعظم شہباز شریف نے صدر ٹرمپ کو پاکستان کے سرکاری دورے کی دعوت بھی دی۔
