عمان کے قریب ایک کشتی حادثے میں 19 پاکستانی ڈوب گئے ہیں اور تاحال لاپتا ہیں، جبکہ ایک پاکستانی کو زندہ بچایا جا سکا ہے۔
وفاقی تحقیقاتی ادارے ایف آئی اے نے عمان کے قریب غیر قانونی تارکین وطن کی کشتی کے حادثے کی ابتدائی رپورٹ تیار کی ہے، جس کے مطابق 20 پاکستانیوں پر مشتمل کشتی 7 ستمبر کو طوفان کی نذر ہوگئی تھی۔
حادثے کے دوران کشتی میں گیس سلنڈر پھٹنے سے آگ بھڑک اٹھی، جس کے بعد تمام مسافر سمندر میں کود گئے۔
رپورٹ میں بتایا گیا کہ کشتی حادثے میں صرف حامد اللہ خان زندہ بچا، جسے ایک بحری جہاز نے ریسکیو کیا۔ زندہ بچ جانے والے پاکستانی کو عمانی حکام نے حراست میں لیا ہے اور پاکستانی سفارتخانہ اس کی وطن واپسی کے انتظامات کر رہا ہے۔
ابتدائی معلومات کے مطابق کشتی گوادر سے ایران کے راستے عمان کے لیے روانہ ہوئی تھی۔ حامد اللہ خان نے اپنے 19 ساتھیوں میں سے 11 کی شناخت فراہم کر دی ہے، جبکہ باقی لاپتا افراد کے بارے میں مزید معلومات کے لیے عمانی وزارت خارجہ سے رابطہ جاری ہے۔
وزارت خارجہ اور ایف آئی اے کے مطابق واقعے کی مکمل تفصیلات کا انتظار ہے، اور پاکستانی مشن عمانی پولیس اور امیگریشن حکام کے ساتھ مسلسل رابطے میں ہے۔
