سندھ ہائیکورٹ میں گورنر سندھ کو عہدے سے ہٹانے کی درخواست پر سماعت، نوٹس جاری

کراچی: سندھ ہائیکورٹ کے آئینی بینچ میں گورنر سندھ کو عہدے سے ہٹانے سے متعلق درخواست پر سماعت ہوئی۔ عدالت نے ایڈووکیٹ جنرل سندھ اور اٹارنی جنرل پاکستان کو نوٹس جاری کرتے ہوئے فریقین سے 8 اکتوبر تک جواب طلب کرلیا۔
سماعت کے دوران جسٹس عدنان الکریم میمن نے استفسار کیا کہ کیا عدالت کو اختیار ہے کہ گورنر کو عہدے سے ہٹائے؟ درخواست گزار احمد علی گبول ایڈووکیٹ نے مؤقف اپنایا کہ صدر مملکت کو درخواست میں فریق بنایا گیا ہے اور عدالت ان کو ہدایات جاری کرسکتی ہے۔
عدالت نے مزید سوال کیا کہ گورنر کو عہدے سے کیوں ہٹایا جانا چاہئے؟ جس پر درخواست گزار کے وکیل نے کہا کہ گورنر کا عہدہ غیر جانبدار ہوتا ہے لیکن موجودہ گورنر سیاسی جماعت کے لیے سرگرم ہیں، جبکہ گورنر وفاق کا نمائندہ ہوتے ہیں اور ان کا کردار غیر جانبدار رہنا ضروری ہے۔