کراچی: سندھ اور پنجاب میں پیٹرولیم مصنوعات کی فراہمی میں رکاوٹ کا خطرہ پیدا ہوگیا ہے، جس کی وجہ وفاقی حکومت کے متنازع کینال منصوبے کے خلاف سندھ میں جاری احتجاج اور سڑکوں کی بندش بتائی جا رہی ہے۔
آئل کمپنیز ایڈوائزری کونسل (او سی اے سی) کے مطابق لاڑکانہ اور سکھر کے علاقوں میں احتجاجی دھرنوں کے سبب تقریباً 800 آئل ٹینکرز پھنس گئے ہیں، جس سے اندرون سندھ اور پنجاب میں پیٹرول، ڈیزل اور دیگر مصنوعات کی قلت کے خدشات بڑھ گئے ہیں۔
او سی اے سی نے چیف سیکریٹری سندھ کو ارسال کردہ خط میں اپیل کی ہے کہ متعلقہ ادارے اس سنگین صورتحال کا فوری نوٹس لیں اور آئل سپلائی کی روانی کو یقینی بنانے کے لیے اقدامات کیے جائیں۔
ادھر صوبائی وزیر اطلاعات شرجیل میمن نے کہا ہے کہ سیاسی جماعتوں کو پرامن احتجاج کا حق حاصل ہے لیکن اس دوران عوام کی سہولت کا بھی خیال رکھا جائے۔
