پاکستانی نوجوان بیٹر معاذ صداقت کی سری لنکا کے خلاف ٹی ٹوئنٹی میچ میں شاندار بیٹنگ، منفرد چھکے نے شائقین کو حیران کردیا۔
راولپنڈی: پاکستان کے نوجوان بلے باز معاذ صداقت نے سری لنکا کے خلاف پہلے ٹی ٹوئنٹی میچ میں جارحانہ بیٹنگ کا مظاہرہ کرتے ہوئے شائقین کی توجہ حاصل کرلی۔ ڈیبیو میچ میں ان کی دلکش بیٹنگ اور منفرد شاٹ کی ویڈیو
سوشل میڈیا پر وائرل ہوگئی۔
تفصیلات کے مطابق راولپنڈی میں کھیلے گئے پہلے ٹی ٹوئنٹی میچ میں معاذ صداقت نے اپنے انٹرنیشنل کیریئر کا آغاز کرتے ہوئے پہلی نصف سنچری اسکور کی اور اپنی صلاحیتوں کا بھرپور اظہار کیا۔
معاذ صداقت نے اپنے کیریئر کی دوسری ہی گیند پر سری لنکن فاسٹ بولر ایشان مالنگا کی آف اسٹمپ سے باہر پڑنے والی فل لینتھ گیند پر زبردست ’نو لک سکس‘ لگایا۔ ان کے اس غیر معمولی شاٹ نے گراؤنڈ میں موجود
تماشائیوں کو خوب محظوظ کیا۔
نوجوان پاکستانی بیٹر نے اسی اوور میں ایک اور چھکا جڑ کر اپنے جارحانہ اندازِ بیٹنگ کا ثبوت دیا۔ ان کے دلکش شاٹس نے میچ میں سنسنی پیدا کرنے کے ساتھ ان کے اعتماد اور بیٹنگ کی صلاحیتوں کو بھی نمایاں کردیا۔