پولیس قانون کے دائرے میں رہے،اختیارات سے تجاوز نہ کرے:ہائیکورٹ

ملتان ( کورٹ رپورٹر) عدالتی احکامات کے باوجود پٹیشنر اور اس کے گھر والوں کو مسلسل ہراساں و پریشان کرنے کا نوٹس لیتے ہوئے ہائی کورٹ ملتان بنچ کے
جج جسٹس محمد وحید خان نے کہا کہ پولیس قانون کے دائرے میں رہے اور اپنے اختیارات سے تجاوز نہ کرے۔وہ گزشتہ روز ایس ایچ او تھانہ روہیلانوالی کے خلاف غلام محمد کی توہین عدالت کی درخواست کی سماعت کررہے تھے۔ پٹیشنر کے وکیل محمد عامر خان بھٹہ نے فاضل عدالت کو اگاہ کیا کہ عدالت عالیہ کے روبرو یقین دہانی کے باوجود پولیس پٹیشنر غلام محمد وغیرہ کو ایک بار پھر پریشان کررہی ہے اس پر فاضل عدالت میں موجود ایس ایچ او سے استفسار کیا گیا کہ وہ اب کیوں انہیں ہراساں و پریشان کررہے ہیں تو اس نے جواب دیا کہ مدعی نے ان پر شبہ کا اظہار کیاتھا تاہم اب اس کی تسلی ہوگئی ہے۔ اس لئے آئندہ پٹیشنر کو کچھ نہیں کہا جائے گا۔