پاکستانی اداکار حمزہ علی عباسی نے کہا ہے کہ اگر کوئی بیوہ یا طلاق یافتہ خاتون دوبارہ شادی کرنا چاہے تو معاشرے کو اسے منفی یا معیوب نظر سے نہیں دیکھنا چاہیے۔
ایک ویڈیو پیغام میں حمزہ علی عباسی نے کہا کہ ہمارے معاشرے میں ایک مخصوص سوچ پائی جاتی ہے، جس کے تحت بیوہ اور طلاق یافتہ خواتین، خصوصاً وہ خواتین جن کے بچے بھی ہوں، اگر دوسری شادی کا فیصلہ کریں تو اسے اچھا نہیں سمجھا جاتا۔
اداکار کا کہنا تھا کہ کسی شخص نے دوبارہ شادی کرنی ہے یا نہیں، یہ اس کا ذاتی فیصلہ ہے اور دوسروں کو اس معاملے میں مداخلت نہیں کرنی چاہیے۔
حمزہ علی عباسی نے اپیل کی کہ جو خواتین اپنی مرضی سے دوبارہ شادی کرنا چاہتی ہیں، انہیں معاشرے میں منفی نظروں کا سامنا نہیں ہونا چاہیے۔ ان کے مطابق دوبارہ شادی کرنا خواتین کا حق ہے اور یہ حق انہیں دین نے بھی دیا ہے۔
انہوں نے مزید کہا کہ اپنی زندگی سے متعلق ذاتی فیصلے کرنے والے کسی فرد کی راہ میں رکاوٹ بننا یا اس کے فیصلے میں غیر ضروری مداخلت کرنا اخلاقی طور پر درست نہیں۔ معاشرے کو چاہیے کہ وہ ایسے معاملات میں تنقید کے بجائے افراد کے فیصلوں کا احترام کرے۔
