اسلام آباد: سپریم کورٹ نے بانی پی ٹی آئی عمران خان کو شفا اسپتال منتقل کرنے کے فیصلے کے خلاف حکومت کی جانب سے دائر نظرثانی درخواست اعتراضات کے ساتھ واپس کردی۔
ذرائع کے مطابق سپریم کورٹ کے رجسٹرار آفس نے حکومتی نظرثانی درخواست پر متعدد اعتراضات عائد کیے ہیں۔ درخواست میں مطلوبہ پیپر بکس مکمل نہ ہونے کا اعتراض بھی شامل ہے۔
ذرائع کا کہنا ہے کہ رجسٹرار آفس کے اعتراضات دور کرنے کے بعد حکومت کی جانب سے نظرثانی درخواست دوبارہ عدالت میں جمع کرائی جائے گی۔
واضح رہے کہ سپریم کورٹ نے دو روز قبل عمران خان کو آئندہ سماعت تک اسلام آباد کے شفا اسپتال منتقل کرنے کا حکم دیا تھا، تاہم تاحال انہیں اسپتال منتقل نہیں کیا گیا۔
عدالتی حکم کے بعد چیف کمشنر اسلام آباد نے ایڈووکیٹ جنرل اسلام آباد کے ذریعے عمران خان کی اسپتال منتقلی سے متعلق فیصلے پر نظرثانی کی درخواست دائر کی تھی۔
