اسلام آباد: اسلام آباد ہائیکورٹ نے معروف حکیم شہزاد کی بطور طبیب رجسٹریشن منسوخ کیے جانے سے متعلق طب کونسل کے فیصلے کو آئندہ سماعت تک معطل کرتے ہوئے کونسل سے جواب طلب کرلیا۔
کیس کی سماعت جسٹس محمد آصف نے حکیم شہزاد کی جانب سے دائر درخواست پر کی۔ درخواست گزار کی نمائندگی وکیل شیر افضل مروت نے کی۔
دورانِ سماعت درخواست گزار کے وکیل نے عدالت کو بتایا کہ طب کونسل نے حکیم شہزاد کی طبیب کی حیثیت سے رجسٹریشن منسوخ کردی تھی، تاہم یہ اقدام انہیں مؤقف پیش کرنے یا سنے جانے کا مناسب موقع دیے بغیر کیا گیا۔
وکیل نے عدالت سے استدعا کی کہ رجسٹریشن منسوخی کے حکم کو غیر مؤثر قرار دیا جائے۔
عدالت نے ابتدائی سماعت کے بعد طب کونسل کی جانب سے رجسٹریشن منسوخی کا فیصلہ اگلی سماعت تک معطل کردیا اور کونسل کو نوٹس جاری کرتے ہوئے جواب طلب کرلیا۔ بعد ازاں عدالت نے کیس کی مزید سماعت ملتوی کردی۔
