لاہور: پاکستان کرکٹ بورڈ (پی سی بی) نے متعدد قومی کرکٹرز کو بیرونِ ملک ٹی20 لیگز میں شرکت کے لیے این او سی جاری کر دیے ہیں۔
پی سی بی کی جانب سے حسن نواز، حنین شاہ، نسیم شاہ اور عثمان خان کو کیریبین پریمیئر لیگ (CPL) میں شرکت کی اجازت دی گئی ہے۔ اسی طرح معاذ صداقت، صاحبزادہ فرحان، سفیان مقیم اور شاداب خان کو بھی سی پی ایل کھیلنے کے لیے این او سی جاری کیے گئے ہیں۔
ان کھلاڑیوں کے این او سی کی مدت 19 اگست سے 21 ستمبر تک مقرر کی گئی ہے۔
اس کے علاوہ اسپنر نعمان علی کو لنکا شائر کاؤنٹی کی نمائندگی کے لیے 27 ستمبر تک این او سی دیا گیا ہے۔
وکٹ کیپر بیٹر محمد حارث کو 7 اگست سے 20 ستمبر تک سی پی ایل میں شرکت کی اجازت ملی ہے، جبکہ مسٹری اسپنر عثمان طارق کے لیے این او سی کی مدت 8 اگست سے 18 ستمبر تک رکھی گئی ہے۔
اسی طرح اسامہ میر کو بھی 7 اگست سے 21 ستمبر تک کیریبین پریمیئر لیگ میں کھیلنے کے لیے این او سی جاری کیا گیا ہے۔
پی سی بی کے اس فیصلے کے بعد مذکورہ قومی کرکٹرز مقررہ مدت کے دوران بیرونِ ملک لیگز میں شرکت کر سکیں گے۔
