اسلام آباد: اسلام آباد پولیس میں بھرتی کے لیے فزیکل ٹیسٹ دینے آنے والا ایک نوجوان دوڑ کے دوران اچانک بے ہوش ہو گیا اور جانبر نہ ہو سکا۔
پولیس حکام کے مطابق 25 سالہ امیدوار اسحاق بھرتی کے لیے ہونے والے فزیکل ٹیسٹ میں دوڑ مکمل کر رہا تھا کہ اچانک زمین پر گر کر بے ہوش ہو گیا۔ موقع پر موجود عملے نے فوری طور پر امدادی کارروائی کرتے ہوئے اسے ایمبولینس کے ذریعے پمز اسپتال منتقل کیا۔
اسلام آباد پولیس کے مطابق اسپتال پہنچنے پر ڈاکٹروں نے بتایا کہ نوجوان راستے ہی میں انتقال کر چکا تھا۔
پولیس کا کہنا ہے کہ جاں بحق ہونے والے امیدوار اسحاق کا تعلق سرائے نورنگ، ضلع لکی مروت سے تھا۔ واقعے کے بعد مزید قانونی کارروائی اور ضروری ضابطے کی کارروائی مکمل کی جا رہی ہے۔
