لاہور: پاکستان ریلویز نے لاہور اور کراچی کے درمیان چلنے والی اپنی پریمیئم شالیمار ایکسپریس کو ایک ماہ کے لیے عارضی طور پر معطل کرنے کا اعلان کر دیا ہے۔
ریلوے حکام کے مطابق شالیمار ایکسپریس لاہور سے فیصل آباد کے راستے کراچی تک سفر کرتی ہے، تاہم قلعہ ستار شاہ مسن کالر ریلوے پل سیلابی پانی سے متاثر ہونے کے باعث لاہور اور فیصل آباد کے درمیان ٹرین آپریشن متاثر ہوا ہے، جس کے پیش نظر ٹرین سروس عارضی طور پر بند کر دی گئی ہے۔
انتظامیہ کا کہنا ہے کہ شالیمار ایکسپریس پرائیویٹ سیکٹر کے اشتراک سے چلائی جانے والی پاکستان ریلویز کی اہم پریمیئم ٹرینوں میں شامل ہے۔
دوسری جانب ریلوے نے لاہور سے کراچی جانے والی قراقرم ایکسپریس کا روٹ بھی تبدیل کر دیا ہے۔ نئی ہدایات کے مطابق یہ ٹرین اب فیصل آباد کے بجائے ساہیوال کے راستے کراچی روانہ ہوگی تاکہ مسافروں کی سفری سہولت برقرار رکھی جا سکے۔
