سان فرانسسکو: یوٹیوب نے اپنے صارفین کے لیے ایک نیا اور کارآمد فیچر متعارف کرا دیا ہے، جس کے ذریعے ویڈیوز، خصوصاً YouTube Shorts کے تھمب نیلز کو زیادہ آسانی سے تبدیل اور بہتر بنایا جا سکے گا۔
کمپنی کے مطابق نئے ٹولز کی مدد سے صارفین اپنی شارٹس ویڈیوز کے لیے کسٹم تھمب نیل اپ لوڈ کر سکیں گے، تاہم یہ سہولت ابتدائی مرحلے میں صرف ان کریئیٹرز کے لیے دستیاب ہوگی جو YouTube Partner Program کا حصہ ہیں اور اپنی ویڈیوز سے آمدن حاصل کر رہے ہیں۔
اس نئے فیچر کے ذریعے کریئیٹرز اپنی پہلے سے اپ لوڈ کی گئی شارٹس ویڈیوز کے تھمب نیلز بھی YouTube Studio کے ذریعے ڈیسک ٹاپ یا لیپ ٹاپ پر جا کر تبدیل کر سکیں گے، جس سے ویڈیوز کو مزید پرکشش انداز میں پیش کرنا ممکن ہوگا۔
یوٹیوب نے بتایا ہے کہ مستقبل میں اس سہولت کو دیگر صارفین کے لیے بھی مرحلہ وار متعارف کرایا جائے گا تاکہ زیادہ سے زیادہ کریئیٹرز اس سے فائدہ اٹھا سکیں۔
کمپنی کے مطابق کمپیوٹر پر صارفین کو ویڈیو کے لیے تین تجویز کردہ فریمز میں سے کسی ایک کو تھمب نیل کے طور پر منتخب کرنے کا اختیار ہوگا، جبکہ موبائل ایپ میں پہلے کی طرح ویڈیو کے کسی بھی فریم کو تھمب نیل بنایا جا سکے گا۔
یوٹیوب کا کہنا ہے کہ تجویز کیے جانے والے تھمب نیلز ویڈیو کے موضوع، مواد اور انداز کو مدنظر رکھتے ہوئے منتخب کیے جائیں گے تاکہ ناظرین کی توجہ زیادہ مؤثر انداز میں حاصل کی جا سکے۔
