حکومت کی جانب سے آج پیٹرولیم مصنوعات کی قیمتوں پر نظرثانی متوقع ہے، جبکہ ذرائع کے مطابق پیٹرول اور ہائی اسپیڈ ڈیزل کی قیمتوں میں نمایاں اضافے کا امکان ظاہر کیا جا رہا ہے، جس سے عوام پر مہنگائی کا مزید بوجھ پڑ سکتا ہے۔
عالمی منڈی میں خام تیل کی قیمتوں میں مسلسل اضافے کے اثرات پاکستان تک پہنچنے لگے ہیں۔ ایران اور امریکا کے درمیان حالیہ کشیدگی کے باعث بین الاقوامی سطح پر تیل مہنگا ہونے کے بعد امکان ہے کہ 18 جولائی سے نافذ ہونے والی نئی قیمتوں میں ہائی اسپیڈ ڈیزل تقریباً 40 روپے فی لیٹر جبکہ پیٹرول 10 روپے فی لیٹر تک مہنگا ہو سکتا ہے۔
رپورٹس کے مطابق حکومت ممکنہ اضافے کے اثرات کو کسی حد تک کم کرنے کے لیے پیٹرولیم لیوی میں کمی کے مختلف آپشنز پر بھی غور کر رہی ہے تاکہ صارفین پر پڑنے والے مالی دباؤ میں کمی لائی جا سکے۔
دوسری جانب حکومت نے پیٹرولیم مصنوعات کی مصنوعی قلت پیدا کرنے اور ذخیرہ اندوزی میں ملوث عناصر کے خلاف سخت کارروائی کا فیصلہ کیا ہے۔ نیشنل کمیٹی آن مانیٹرنگ اینڈ کوآرڈینیشن نے اس معاملے کا نوٹس لیتے ہوئے اوگرا کو ہدایت جاری کی ہے کہ ذخیرہ اندوزوں کے خلاف فوری قانونی اقدامات کیے جائیں اور ملک بھر میں پیٹرولیم مصنوعات کی بلا تعطل فراہمی یقینی بنائی جائے۔
معاشی ماہرین کا کہنا ہے کہ عالمی جغرافیائی اور سیاسی حالات کے باعث خام تیل کی قیمتوں میں اتار چڑھاؤ درآمدی ممالک، خصوصاً پاکستان، کے لیے مسلسل چیلنج بنا ہوا ہے۔ ان کے مطابق موجودہ صورتحال میں متبادل توانائی کے ذرائع کو فروغ دینا اور طویل مدتی پالیسی اپنانا وقت کی اہم ضرورت ہے۔
