لاہور( روزنامہ قوم انویسٹی گیشن سیل) پنجاب آفیسرز کوآپریٹو ہاؤسنگ سوسائٹی رائیونڈ روڈ لاہور میں 15 ارب روپے کے مبینہ فراڈ میں ملوث خود ساختہ صدر ندیم اکرام ورک کی بطور صدر بحالی کی درخواست سیکرٹری کوآپریٹو نے مسترد کر دی اور حکم دیا کہ کوآپریٹو ڈیپارٹمنٹ کی طرف سے بنائی گئی تین رکنی کمیٹی ہی سوسائٹی کے کنٹرول کو سنبھالے گی اور سارے معاملات کا جائزہ لے کر تفصیلی آڈٹ کرے گی۔ سیکرٹری کے حکم سے کوآپریٹو ڈیپارٹمنٹ کے افسران پر مشتمل تین رکنی عبوری کمیٹی نے سوسائٹی کا کنٹرول سنبھال لیا ہے جبکہ ندیم اکرام ورک پاکستان سے فرار ہونے کی تیاری کر رہا ہے۔ یاد رہے کہ روزنامہ قوم نے اربوں روپے کے اس سکینڈل کو بے نقاب کیا اور اعلیٰ حکام کی توجہ اس جانب مبدول کروائی اس پر سیکرٹری کوآپریٹو کے حکم پر ڈیپارٹمنٹ نے فوری ایکشن لیا اور سوسائٹی کا کنٹرول سنبھال لیا۔ قبل ازیں ندیم اکرام ورک ہائی کورٹ سے بھی اپنی درخواست مسترد کروا چکا ہے۔
