کراچی : عالمی اور ملکی صرافہ مارکیٹوں میں سونے اور چاندی کی قیمتوں میں مسلسل تیسرے روز بھی کمی کا رجحان برقرار رہا، جس کے باعث قیمتی دھاتوں کے نرخ مزید نیچے آ گئے۔
بین الاقوامی بلین مارکیٹ میں فی اونس سونے کی قیمت 25 ڈالر کی کمی کے بعد 4 ہزار 125 ڈالر پر آ گئی، جس کے اثرات مقامی مارکیٹ پر بھی نمایاں طور پر دیکھنے میں آئے۔
آل پاکستان صرافہ مارکیٹ میں فی تولہ سونے کی قیمت 2 ہزار 500 روپے کم ہو کر 4 لاکھ 34 ہزار 936 روپے ہو گئی، جبکہ 10 گرام سونے کی قیمت 2 ہزار 143 روپے کی کمی کے بعد 3 لاکھ 72 ہزار 887 روپے ریکارڈ کی گئی۔
چاندی کی قیمتوں میں بھی کمی دیکھی گئی۔ فی تولہ چاندی 120 روپے سستی ہونے کے بعد 6 ہزار 559 روپے پر آ گئی، جبکہ 10 گرام چاندی کی قیمت 103 روپے کم ہو کر 5 ہزار 623 روپے تک پہنچ گئی۔
ماہرین کے مطابق عالمی مارکیٹ میں سونے کی قیمتوں میں آنے والی گراوٹ کے باعث مقامی صرافہ بازار میں بھی قیمتیں مسلسل نیچے آ رہی ہیں، تاہم آئندہ دنوں میں عالمی معاشی صورتحال اور ڈالر کی قدر قیمتوں کے رجحان پر اثر انداز ہو سکتی ہے۔
