لاہور: ضلع کچہری لاہور نے معروف مصنف و ڈرامہ نویس خلیل الرحمان قمر کی نامناسب ویڈیو کے وائرل ہونے سے متعلق مقدمے میں گرفتار ملزمہ آمنہ عروج کی این سی سی آئی اے کے تحت ضمانت کو خارج کر دیا ہے۔
فیصلے میں عدالت نے کہا کہ آمنہ عروج کے وکیل نے دلائل دیے کہ مقدمہ ایک سال تین ماہ تاخیر سے درج ہوا اور ان کی موکلہ کا اس معاملے میں کوئی براہِ راست کردار نہیں ہے۔ وکیل نے مزید کہا کہ یہ مقدمہ ضمانت کی معطلی کے بعد درج کیا گیا، جس میں آمنہ عروج کو بلاوجہ ملوث کیا گیا ہے۔
تاہم، پراسکیوٹر نے عدالت کو بتایا کہ ملزمہ نے ویڈیو بنانے اور اسے وائرل کرنے میں کلیدی کردار ادا کیا جبکہ دیگر شریک ملزمان صرف سہولت فراہم کرنے کے لیے نامزد کیے گئے ہیں۔
عدالت نے مقدمے کا ریکارڈ اور دستیاب ثبوت دیکھنے کے بعد فیصلہ کیا کہ آمنہ عروج کے خلاف مقدمہ غیر قابل ضمانت ہے اور درخواست ضمانت خارج کر دی گئی۔
اس مقدمے میں مدعی کی نمائندگی وکیل چوہدری مدثر ایڈووکیٹ نے کی جبکہ این سی سی آئی نے ملزمہ کے خلاف قانونی کارروائی کی ہے۔
