اسلام آباد: انسانی حقوق کے عالمی دن کے موقع پر صدرِ مملکت آصف علی زرداری نے کہا ہے کہ ہر شہری کی عزت، مساوات اور انصاف کو یقینی بنانا ریاست کی بنیادی ذمہ داری ہے۔ انہوں نے یقین دہانی کرائی کہ حکومت پاکستان انسانی حقوق کے فروغ اور تحفظ کے لیے مکمل طور پر پرعزم ہے۔
صدر زرداری نے اپنے پیغام میں کہا کہ اسلام انسانیت، سماجی مساوات اور انسانی وقار پر زور دیتا ہے، جبکہ آئینِ پاکستان ہر شہری کو بلا امتیاز بنیادی حقوق اور آزادی فراہم کرتا ہے۔
انہوں نے قائدِ اعظم محمد علی جناح کے وژن کا حوالہ دیتے ہوئے کہا کہ پاکستان کو ہم آہنگ، مساوی اور وقار پر مبنی ریاست کے طور پر قائم کیا گیا تھا۔
صدر نے زور دیا کہ ملک میں کمزور طبقات، خصوصاً خواتین، بچے، اقلیتیں اور خصوصی افراد کے حقوق کے تحفظ اور انہیں بااختیار بنانے کے لیے مؤثر اقدامات ضروری ہیں۔ انہوں نے معاشرے میں برداشت، احترام اور باہمی وقار کے فروغ کو وقت کی اہم ضرورت قرار دیا اور کہا کہ سول سوسائٹی، تمام ادارے اور بین الاقوامی شراکت دار انسانی حقوق کے فروغ میں اہم کردار ادا کرتے ہیں۔
صدر زرداری نے اقوام متحدہ کی کوششوں کو سراہتے ہوئے کہا کہ یہ دن عالمی سطح پر انسانی حقوق کے فروغ کے لیے اہمیت رکھتا ہے۔ آخر میں انہوں نے قوم سے اپیل کی کہ وہ انسانی وقار کے تحفظ، مساوات کے فروغ اور خوف و جبر سے پاک معاشرے کے قیام کے لیے متحد ہو کر کردار ادا کریں۔
صدر نے دعا کی کہ اللہ تعالیٰ کمزور طبقات کے حقوق کے تحفظ کے لیے ہماری کوششوں کو کامیاب کرے۔
