اسلام آباد: ستائیسیویں آئینی ترمیم کے حوالے سے سینیئر وکلا اور ریٹائرڈ ججز نے چیف جسٹس پاکستان کو خط لکھ دیا ہے۔
خط میں چیف جسٹس سے سپریم کورٹ کی فل کورٹ میٹنگ بلانے کا مطالبہ کیا گیا ہے۔
خط پر جسٹس (ر) مشیر عالم، مخدوم علی خان، منیر اے ملک، عابد زبیری، جسٹس (ر) ندیم اختر، اکرم شیخ، انور منصور، علی احمد کرد، خواجہ احمد حسین اور صلاح الدین احمد کے دستخط شامل ہیں۔
سینیئر وکلا اور ریٹائرڈ ججز نے کہا ہے کہ سپریم کورٹ ترمیم پر اپنا مؤقف پیش کرنے کا حق رکھتی ہے اور اس معاملے پر ردعمل دینا ضروری ہے۔
خط میں مزید کہا گیا ہے کہ یہ غیر معمولی حالات میں لکھا گیا ہے، اور سپریم کورٹ اپنی تاریخ میں سب سے بڑے چیلنج کا سامنا کر رہی ہے۔ کسی بھی سول یا فوجی حکومت نے سپریم کورٹ کو اپنا ماتحت ادارہ بنانے میں کامیابی حاصل نہیں کی۔
خط میں واضح کیا گیا ہے کہ اگر یہ پہلی کوشش ہے تو سپریم کورٹ کے لیے اس پر ردعمل دینا لازمی ہے۔
