راولپنڈی: انسدادِ دہشت گردی کی عدالت راولپنڈی نے سانحہ 9 مئی سے متعلق 11 مقدمات کی سماعت 13 نومبر تک ملتوی کر دی۔ جج امجد علی شاہ نے کیس کی سماعت کی، جس دوران سابق وزیرِ داخلہ شیخ رشید احمد عدالت میں پیش ہوئے۔ انہوں نے حاضری لگوائی اور بعد ازاں روانہ ہوگئے۔ صحافی کے سوال پر کہ وہ موجودہ صورتحال پر کیا کہنا چاہیں گے، شیخ رشید نے مختصر جواب دیا: ’’کیا کہیں، پھر تاریخ ہوگئی۔ تاریخ پر تاریخ، کیس پر کیس۔‘‘ عدالتی کارروائی کے دوران صرف ملزمان کی حاضری لگائی گئی، تاہم چالان نقول کی تقسیم مکمل نہ ہو سکی۔ پراسیکیوٹر کے مطابق آئندہ سماعت پر یہ عمل مکمل کر لیا جائے گا۔
سانحہ 9 مئی کے تحت زیرِ سماعت کیسز میں جی ایچ کیو گیٹ 4 پر حملہ، میٹرو اسٹیشن کو آگ لگانے، آرمی میوزیم پر حملہ، صدر میں حساس ادارے کی عمارت پر حملہ، اور مری روڈ پر حساس دفتر پر حملے کے مقدمات شامل ہیں۔
دیگر ملزمان نے بھی حاضری لگوائی اور کارروائی مکمل ہونے کے بعد عدالت سے روانہ ہوگئے۔
