لاہور: ہائی کورٹ میں رجب بٹ اور دیگر کے ساتھ مل کر خاتون سے زیادتی کے کیس میں ملزم سلمان حیدر کی درخواستِ ضمانت پر سماعت ہوئی۔ جسٹس جواد ظفر نے کیس کی سماعت کرتے ہوئے متعلقہ ایس پی کو 19 ستمبر کو رپورٹ سمیت طلب کر لیا۔
سماعت کے دوران تفتیشی افسر نے عدالت کو بتایا کہ ملزم سلمان حیدر تفتیش میں قصوروار پایا گیا ہے۔ تاہم مدعیہ کے وکیل نے مؤقف اپنایا کہ تفتیش میں سنگین خامیاں موجود ہیں اور شریک ملزمان رجب بٹ اور مان ڈوگر کو حقائق کے برعکس کلین چٹ دے دی گئی۔ ان کا کہنا تھا کہ یہ واضح نہیں کیا گیا کہ شریک ملزمان کو چھوڑنے کی بنیاد کیا ہے۔
وکیل مدعیہ نے مزید کہا کہ مدعیہ اور ان کی بہن کے موبائل فونز سے سارا ڈیٹا ڈیلیٹ کیا گیا، جبکہ ملزم سلمان حیدر بار بار دھمکیاں دے کر زیادتی کرتا رہا۔ انہوں نے عدالت سے استدعا کی کہ ملزم کی ضمانت کی درخواست مسترد کی جائے۔
دوسری جانب سلمان حیدر کے وکیل نے مؤقف اختیار کیا کہ تھانہ نواب ٹاؤن پولیس نے جھوٹے حقائق کی بنیاد پر مقدمہ درج کیا اور عدالت سے درخواست کی کہ عبوری ضمانت کنفرم کی جائے۔
