کراچی: سندھ کے سینئر وزیر شرجیل انعام میمن نے چیئرمین پیپلز پارٹی بلاول بھٹو زرداری کی سیلاب متاثرین کے لیے کی جانے والی کوششوں کو سراہتے ہوئے کہا ہے کہ ان کی قیادت متاثرہ خاندانوں کے لیے امید کی کرن ہے۔
شرجیل میمن کا کہنا تھا کہ بلاول بھٹو عوام کے دکھ درد کو اپنا سمجھتے ہیں اور پیپلز پارٹی ان کی رہنمائی میں متاثرین کی مکمل بحالی تک خاموش نہیں بیٹھے گی۔ انہوں نے کہا کہ بلاول بھٹو کا مؤقف عوام دوستی اور دور اندیش قیادت کی عکاسی کرتا ہے، جنہوں نے ہمیشہ مشکل وقت میں عوام کا ساتھ دیا۔ آج بھی ان کی اولین ترجیح غریب طبقہ، کسان اور سیلاب متاثرہ خاندان ہیں۔
سینئر وزیر نے کہا کہ بلاول بھٹو کے مطالبے پر وفاقی حکومت نے ماحولیاتی اور زرعی ایمرجنسی کا اعلان کیا جو خوش آئند ہے، تاہم بینظیر انکم سپورٹ پروگرام کے تحت ریلیف پیکیج کا اعلان نہ ہونا افسوسناک ہے۔ ان کے مطابق وزیر اعظم شہباز شریف نے اس پیکیج کے حوالے سے بلاول بھٹو کو یقین دہانی کرائی تھی لیکن پنجاب، جنوبی پنجاب، خیبر پختونخوا اور گلگت بلتستان کے عوام اب بھی اس کے منتظر ہیں۔
انہوں نے مزید کہا کہ بلاول بھٹو نے درست نشاندہی کی کہ اقوام متحدہ کے پلیٹ فارم سے عالمی امداد کی اپیل میں تاخیر قابل تشویش ہے۔ پیپلز پارٹی ہر فورم پر عوام کی آواز بنے گی اور متاثرین کی بحالی کو قومی ایجنڈا بنانے کے لیے قراردادیں لائے گی۔
شرجیل انعام میمن نے بتایا کہ بلاول بھٹو نے سندھ، وسطی اور جنوبی پنجاب کے متاثرہ علاقوں کے دورے کیے اور بعد میں وزیر اعلیٰ سندھ و صوبائی وزیر زراعت سے ملاقات کر کے کسانوں کی بحالی کے لیے عملی منصوبہ بندی کی۔ ان کا کہنا تھا کہ زرعی شعبہ سب سے زیادہ متاثر ہوا ہے اور کسانوں کو دوبارہ اپنے پیروں پر کھڑا کرنا بلاول بھٹو زرداری کا وژن ہے، جس پر سندھ حکومت اقدامات کر رہی ہے اور وفاقی حکومت کے تعاون کی توقع رکھتی ہے۔
