اسلام آباد: ڈسٹرکٹ اینڈ سیشن کورٹس اسلام آباد نے 5 اگست احتجاج کیس میں گرفتار پی ٹی آئی کارکنان کی ضمانتیں منظور کر لیں۔
تفصیلات کے مطابق عدالت نے 9 پی ٹی آئی کارکنوں کی ضمانت کی درخواستیں 10 ہزار روپے کے مچلکوں کے عوض منظور کیں۔ کیس کی سماعت جوڈیشل مجسٹریٹ عمران امیر عباسی نے کی۔
سماعت کے دوران وکیل مرزا عاصم ایڈووکیٹ نے مؤقف اختیار کیا کہ یہ مقدمہ بے بنیاد ہے اور ایف آئی آر کا مدعی بھی متعلقہ شخص نہیں ہے۔ انصر کیانی ایڈووکیٹ نے عدالت کو بتایا کہ اسی کیس میں خواتین کی ضمانت پہلے ہی منظور ہو چکی ہے اور پولیس ریکارڈ کے مطابق کسی بھی ملزم سے کوئی برآمدگی نہیں ہوئی۔
مرزا عاصم بیگ نے مزید کہا کہ اس واقعے کے بعد ایک اور کیس بھی درج کیا گیا، جس میں انہی دفعات کو دوبارہ شامل کیا گیا ہے۔
واضح رہے کہ پی ٹی آئی کارکنان کے خلاف تھانہ لوہی بھیر میں پاپو سمیت دیگر دفعات کے تحت مقدمہ درج ہے۔
