اسلام آباد: سینیٹر عرفان صدیقی نے کہا ہے کہ 9 مئی کے مقدمات خالصتاً جرائم سے متعلق ہیں، سیاسی رنگ دینا درست نہیں، اگر ایسے واقعات کسی اور ملک میں پیش آتے تو نتائج نہایت سخت ہوتے۔
نجی ٹی وی پروگرام میں گفتگو کرتے ہوئے ن لیگ کے رہنما نے بھارتی فضائیہ کے سربراہ ائیر چیف مارشل اے پی سنگھ کے اس دعوے کو بے بنیاد اور مضحکہ خیز قرار دیا، جس میں کہا گیا تھا کہ مئی میں ہونے والی 4 روزہ جھڑپ کے دوران پاکستان کے 5 طیارے مار گرائے گئے۔
ان کا کہنا تھا کہ یہ دعویٰ اتنا غیر حقیقی ہے کہ بھارتی وزیراعظم نریندر مودی نے بھی اپنی ایک گھنٹہ 50 منٹ طویل پارلیمانی تقریر میں اس کا ذکر نہیں کیا۔ جھوٹ بولنے والے کا حافظہ نہیں ہوتا، شاید بھارتی ائیر چیف سمجھتے ہیں کہ دنیا ان کے دعوے پر یقین کر لے گی۔
عرفان صدیقی کے مطابق بھارتی ریاست بہار میں انتخابات قریب ہیں اور اگر بی جے پی وہاں ناکام رہی تو اس کی سیاسی پوزیشن مزید کمزور ہو جائے گی۔ بی جے پی اپنے لیے خود مسائل پیدا کر رہی ہے جبکہ اپوزیشن لیڈر راہول گاندھی نے پہلی بار انتخابات میں دھاندلی کے شواہد پیش کیے، جس سے گزشتہ الیکشن پر بھی سنگین سوالات اٹھے ہیں۔
انہوں نے کہا کہ بین الاقوامی سطح پر بھارت کی ساکھ تیزی سے متاثر ہو رہی ہے، پہلگام واقعے پر کسی ملک نے بھارتی مؤقف کی تائید نہیں کی، جو اس کی سفارتی ناکامی کا واضح ثبوت ہے۔
9 مئی کے کیسز پر بات کرتے ہوئے عرفان صدیقی نے کہا کہ ان میں سزائیں سنائی جا رہی ہیں اور سزا یافتہ افراد کو اپیل کا حق حاصل ہے، تاہم اصل پس منظر کو نظر انداز کر کے صرف ملزمان پر توجہ دی جا رہی ہے۔ ان کا کہنا تھا کہ اگر امریکا، برطانیہ یا بھارت میں کوئی جماعت ایسی کارروائی کرتی تو انجام بہت سخت ہوتا۔
