اسلام آباد: قومی آفات سے نمٹنے والے ادارے (این ڈی ایم اے) کی جاری کردہ تازہ رپورٹ میں ملک بھر میں حالیہ شدید بارشوں سے ہونے والے جانی و مالی نقصانات کا لرزہ خیز منظرنامہ سامنے آیا ہے۔
رپورٹ کے مطابق شدید بارشوں اور اس سے جڑے حادثات میں جاں بحق افراد کی مجموعی تعداد 221 تک پہنچ چکی ہے، جب کہ 804 سے زائد مکانات مکمل طور پر تباہ ہو چکے ہیں۔
سب سے زیادہ متاثرہ صوبہ پنجاب رہا، جہاں 135 افراد زندگی کی بازی ہار گئے اور 470 زخمی ہوئے۔ اس کے علاوہ 24 مکانات مکمل اور 168 مکانات جزوی طور پر تباہ ہوئے۔
خیبرپختونخوا میں 40 ہلاکتیں اور 69 زخمی رپورٹ ہوئے، جبکہ 78 مکانات مکمل اور 142 جزوی طور پر منہدم ہو چکے ہیں۔
سندھ میں بارشوں کے نتیجے میں 22 افراد جاں بحق، 40 زخمی، 33 مکانات مکمل اور 54 جزوی طور پر متاثر ہوئے۔
بلوچستان میں 16 اموات اور 4 افراد زخمی ہوئے، جبکہ 8 مکانات مکمل اور 56 جزوی طور پر تباہ ہوئے۔
گلگت بلتستان میں 3 افراد زخمی ہوئے اور 66 مکانات مکمل جبکہ 71 جزوی نقصان کا شکار ہوئے۔
آزاد کشمیر میں ایک شخص جاں بحق اور 6 زخمی ہوئے، 17 مکانات مکمل اور 75 کو جزوی نقصان پہنچا۔
اسلام آباد میں بھی بارش نے ایک جان لے لی جبکہ 35 مکانات کو جزوی اور ایک کو مکمل نقصان پہنچا۔
رپورٹ کے مطابق صرف گزشتہ 24 گھنٹوں میں مزید 5 افراد جان کی بازی ہار گئے، جن میں 3 بچے شامل ہیں، جب کہ 25 مکانات گر گئے اور 5 مویشی بھی ہلاک ہوئے۔ مجموعی طور پر 200 سے زائد مویشیوں کی ہلاکت اور 804 مکمل مکانات کی تباہی ریکارڈ کی گئی ہے۔
