اسلام آباد: وزارت تجارت کے حکام کا کہنا ہے کہ سونے کی زیورات کی برآمدات پر عائد پابندی ختم ہو چکی ہے، اور اس کی بحالی کے لیے وزیر اعظم کو سمری ارسال کر دی گئی ہے۔
تفصیلات کے مطابق، قومی اسمبلی کی قائمہ کمیٹی برائے تجارت کا اجلاس چیئرمین جاوید حنیف کی سربراہی میں منعقد ہوا، جس میں زیورات کی برآمدات پر عائد پابندی کا جائزہ لیا گیا۔
اجلاس میں جیولری سیکٹر کے نمائندے نے بتایا کہ مئی میں زیورات کی برآمد پر پابندی عائد کی گئی تھی، جو ایف بی آر کے ایس آر او کے تحت 30 جون تک مؤثر رہی۔ ان کا کہنا تھا کہ ہماری درخواست ہے کہ برآمدات کی بحالی کو یقینی بنایا جائے۔
وزارت تجارت کے حکام نے کمیٹی کو آگاہ کیا کہ زیورات کی برآمدات پر عائد پابندی ختم کر دی گئی ہے اور اس ضمن میں وزیراعظم کو سمری بھجوا دی گئی ہے۔ منظوری کے بعد معاملہ وفاقی کابینہ کو بھیجا جائے گا۔
