شاہ رخ خان کی نئی فلم ’کنگ‘ کی شوٹنگ کے دوران زخمی، امریکا منتقل

بالی ووڈ کے سپر اسٹار شاہ رخ خان اپنی نئی فلم “کنگ” کی شوٹنگ کے دوران زخمی ہوگئے ہیں، جس کے بعد انہیں علاج کے لیے امریکہ منتقل کر دیا گیا ہے۔
بھارتی میڈیا رپورٹس کے مطابق ممبئی میں فلم کے ایکشن سین کی عکس بندی کے دوران شاہ رخ خان کی کمر پر چوٹ لگی۔ اگرچہ چوٹ زیادہ سنگین نہیں ہے، تاہم ڈاکٹروں نے مکمل آرام کا مشورہ دیا ہے اور کہا گیا ہے کہ کم از کم ایک ماہ کی ریکوری ضروری ہے۔
حادثہ اس وقت پیش آیا جب فلم کا ایک ہائی انٹینسٹی اسٹنٹ سین شوٹ کیا جا رہا تھا، اور شاہ رخ نے یہ اسٹنٹ خود کرنے کا فیصلہ کیا تھا۔ قریبی ذرائع کے مطابق یہ پہلا موقع نہیں جب شاہ رخ خان شوٹنگ کے دوران زخمی ہوئے ہوں — اس سے قبل بھی وہ متعدد بار چوٹوں کے باوجود جلد کام پر لوٹے ہیں۔
یاد رہے کہ 2017 میں فلم زیرو کی شوٹنگ کے دوران بھی انہیں گردن میں چوٹ آئی تھی اور تب بھی وہ علاج کے لیے امریکہ گئے تھے۔
اس تازہ حادثے کے بعد فلم “کنگ” کی شوٹنگ عارضی طور پر روک دی گئی ہے۔ پروڈکشن ٹیم کا کہنا ہے کہ شاہ رخ کی صحت پہلے ہے، جبکہ اس وقفے سے فلم کے بجٹ میں ممکنہ اضافہ متوقع ہے۔
فلم “کنگ” کی شوٹنگ پچھلے سال شروع ہوئی تھی اور منصوبہ ہے کہ اسے 2026 کے آغاز میں ریلیز کیا جائے۔ ابتدا میں فلم کی ہدایتکاری سوجوئے گھوش کرنے والے تھے لیکن بعد میں پٹھان کے ہدایتکار سدھارتھ آنند نے یہ ذمہ داری سنبھال لی۔
فلم کی ایک خاص بات یہ بھی ہے کہ شاہ رخ خان کی بیٹی سہانا خان اس فلم سے اپنا ڈیبیو کر رہی ہیں، جب کہ اداکار ابھیشیک بچن بھی اہم کردار میں دکھائی دیں گے۔ کہا جا رہا ہے کہ فلم میں باپ بیٹی کے جذباتی رشتے کو نمایاں انداز میں پیش کیا جائے گا۔
مداح شاہ رخ خان کی جلد صحتیابی کے لیے دعاگو ہیں۔ گزشتہ برس شاہ رخ پٹھان، جوان اور ڈنکی جیسی بلاک بسٹر فلموں کے ساتھ باکس آفس پر چھائے رہے، اور اب “کنگ” ان کے کیریئر کا نیا اور طاقتور باب ثابت ہو سکتی ہے۔
جیسے ہی شاہ رخ خان مکمل طور پر صحتیاب ہوں گے، فلم کی شوٹنگ دوبارہ شروع کی جائے گی تاکہ فلم کو شیڈول کے مطابق ریلیز کیا جا سکے اور مداح اپنے پسندیدہ اسٹار کو جلد اسکرین پر دیکھ سکیں۔