راولپنڈی اسلام آباد میں شدید بارش، نالہ لئی میں طغیانی، وزیراعظم نے ہنگامی اجلاس طلب کر لیا

راولپنڈی اور اسلام آباد میں شدید بارشوں کے بعد ممکنہ سیلابی خطرے کے پیشِ نظر وزیراعظم شہباز شریف نے ہنگامی اجلاس طلب کر لیا ہے۔

ذرائع کے مطابق گزشتہ رات سے جاری موسلا دھار بارش کے نتیجے میں نالہ لئی میں پانی کی سطح تشویشناک حد تک بلند ہو گئی ہے، جس کے باعث وارننگ سائرن بجا دیے گئے ہیں اور قریبی آبادیوں کو فوری طور پر محفوظ مقامات پر منتقل ہونے کی ہدایات جاری کی گئی ہیں۔

محکمہ موسمیات کے مطابق جڑواں شہروں میں گزشتہ رات سے اب تک 230 ملی میٹر بارش ریکارڈ کی گئی ہے جس کے نتیجے میں نشیبی علاقوں میں پانی جمع ہو گیا ہے اور معمولات زندگی شدید متاثر ہوئے ہیں۔

وزیراعظم نے چیف کمشنر راولپنڈی اور ایم ڈی واسا سے فوری طور پر تفصیلی رپورٹ طلب کر لی ہے۔ اجلاس میں بارش سے ہونے والے نقصانات اور سیلاب سے نمٹنے کے لیے کیے گئے حفاظتی اقدامات کا جائزہ لیا جائے گا۔