اسلام آباد: بانی تحریکِ انصاف عمران خان کی ہمشیرہ علیمہ خان نے کہا ہے کہ وہ جلد عدالتی پیشیوں سے نجات حاصل کر لیں گی۔
یہ بیان انہوں نے انسدادِ دہشت گردی عدالت میں عبوری ضمانت کی سماعت کے موقع پر صحافیوں سے مختصر گفتگو میں دیا۔ علیمہ خان تھانہ صادق آباد میں درج ہنگامہ آرائی کیس کے سلسلے میں عدالت میں پیش ہوئیں۔
انسدادِ دہشت گردی عدالت کے جج امجد علی شاہ نے ان کی عبوری ضمانت میں 30 جولائی تک توسیع کرتے ہوئے آئندہ سماعت پر مقدمے کا مکمل ریکارڈ پیش کرنے کا حکم دے دیا، کیونکہ موجودہ سماعت پر ریکارڈ پیش نہیں کیا جا سکا۔
سماعت کے بعد صحافی نے سوال کیا کہ “آپ کبھی اڈیالہ، کبھی عدالت، یہ سلسلہ کب رکے گا؟” جس پر علیمہ خان نے مسکرا کر جواب دیا: “بہت جلد عدالتی پیشیوں سے جان چھوٹ جائے گی”۔
