راولپنڈی: لاہور ہائی کورٹ راولپنڈی بینچ نے سابق وزیراعلیٰ پنجاب چوہدری پرویز الٰہی کو احتساب عدالت کی جانب سے جاری کردہ ذاتی حاضری کے حکم میں بڑا ریلیف دے دیا۔ عدالت نے احتساب عدالت کا فیصلہ معطل کرتے ہوئے پرویز الٰہی کو نیب عدالت میں پیشی سے عبوری استثنا دے دیا۔
چوہدری پرویز الٰہی کی جانب سے دائر رٹ پٹیشن پر سماعت جسٹس شہرام سرور اور جسٹس ساجد محمود سیٹھی پر مشتمل ڈویژن بینچ نے کی، جہاں ان کے وکیل سردار عبدالرازق خان اور عامر سعید راں پیش ہوئے۔
دورانِ سماعت وکلا نے مؤقف اختیار کیا کہ پرویز الٰہی ایک سینئر سیاستدان ہیں اور اس وقت لاہور میں علاج معالجے کے سلسلے میں زیرِ علاج ہیں، جس کے باعث ان کے لیے ہر پیشی پر عدالت آنا ممکن نہیں۔ ٹرائل کورٹ نے ان کی ذاتی حاضری سے استثنا کی درخواست کو بغیر قانونی جواز کے مسترد کیا۔
عدالت نے نیب پراسیکیوٹر سے استفسار کیا کہ اگر پرویز الٰہی کی صحت کے حوالے سے رپورٹ موجود ہے تو پھر انہیں حاضری سے استثنا دینے میں کیا رکاوٹ ہے؟ پراسیکیوٹر نے مؤقف اپنایا کہ بیماری کی نوعیت ایسی نہیں کہ استثنا دیا جائے۔
عدالت نے دلائل سننے کے بعد ابتدائی طور پر چوہدری پرویز الٰہی کی رٹ پٹیشن کو قابلِ سماعت قرار دے دیا، احتساب عدالت کا فیصلہ معطل کر دیا، اور نیب کو تفصیلی جواب کے لیے نوٹس جاری کر دیے۔
